|
Sequitur:
Per fenestras intrabunt quasi fur.
Fenestrae sunt in hoc loco timor, scilicet aeterni supplicii, dolor
praesentis exsilii, spes coelestis praemii, brevitas hujus vitae,
mutabilitas fortunae. Prima respicit ad occidentem, secunda ad
aquilonem, tertia ad orientem, quarta ad austrum, quinta hujus mundi
considerat centrum. Per has singulorum furtim intrant conscientias, quas
facile superant dum praefata ante mentis oculos congregant. Timor
siquidem pungit, dolor expellit, spes trahit, brevitas instigat,
instabilitas fortunae fugat; sicque mens neophyti ad patriam fugiens
festinat.
|
|
