CAPUT 65

Sequitur:

Et eum, qui ab aquilone est,
procul faciam a vobis
et expellam eum in terram inviam et desertam.
Faciem ejus contra mare orientale,
et extremum ejus contra mare novissimum.
Et ascendet fetor ejus
et putredo ejus,
quia superbe egit.

Historice. Juxta quosdam, de Sennacherib et ejus exercitu loquitur: qui superbe egit, quando Deum blasphemavit; qui in terra invia et deserta expulsus est, quando in Perside, per desertum fugiens in templo Nesrac Dei sui, a filiis suis occisus est. Quod autem dicit, faciem contra mare orientale, et extremum ejus ad mare novissimum: tale est. Intentionis ejus erat transire Jordanem et expugnare Jerusalem; sed finis aliter se habuit quia circa Euphratem in Perside occubuit. Hebraica siquidem lingua congregationes aquarum appellavit maria. Unde hic per mare orientale, Jordanem innuit; per novissimum, Euphratem intelligit. Quod autem dixit: Ascendit fetor ejus, et putredo ejus ad interitum, exercitus ipsius respicit. De quo Isaias dicit: Egressus est autem angelus Domini et percussit in castris Assyriorum centum octoginta quinque millia. Et surrexit mane; et ecce omnia cadavera mortuorum (Isai. XXXIII). Juxta alios qui sincerius sentiunt, de Nabuchodonosor sermo est, qui expulsus est in terram inviam et desertam, quando amens factus cum brutis animalibus diu conversatus est; cujus facies contra mare orientale, et extremum ejus ad mare novissimum, quia intentionis ejus erat, ut asserunt historiae, primum orientalem plagam expugnare; deinde occidentalem sibi subjugare. Quod autem dicit, quod fetor et putredo ejus ascendit: tale est. Hebraica docet traditio quod, Nabuchodonosor mortuo, Evilmerodach filius ejus metuens, ne pater suus revivisceret, corpus ejus de sepulcro extraxit, combussit, et in cinerem redegit. Quo in quatuor marsupiis dispertito ad quatuor aquilarum colla ligagavit, quibus per quatuor orbis climata dispositis eas avolare permisit.