|
Sequitur:
Et disceptabo cum eis ibi,
scilicet in valle Josaphat.
Pro populo suo et haereditate, pro causis subjunctis contra gentes
Dominus disceptat; quia inde gentes judicium suscipiunt damnationis,
unde in sequentia facinora inciderunt. Hoc testimonium ad idololatras et
haereticos respicit, qui populum Domini seducentes, ipsum populum
partiti sunt et terram illius dividentes, multisque eam inter se
erroribus separantes, ad culturom idolorum compulerunt, ut alii colerent
Jovem, alii Phoebum, alii Junonem, alii Minervam, Rubiginem, Anubim,
crocodilum, et ibim, noctuas, accipitres, et ciconias. Haeretici quoque
terram Domini, id est Ecclesiam diviserunt, et super populum
ecclesiasticum sortem miserunt, quando eos seducentes, et ad haeresum
errorem deducentes, Arius Arianos, Sabellius Sabellianos, Manes
Manichaeos, et alii alios erroris sui discipulos fecerunt.
|
|
