TIT. CLX. De tribus quae sunt in sermone Dei.

Tria sunt in sermone Dei: Elementa, exordia et completiones. In elementis expressio vocis sed intelligentia non est: in exordio sermonis intelligentia est, sed perfecta non est; in completione sermonis, perfecta intelligentia est. Figurae Veteris Testamenti elementa fuerunt sermonis Dei. Praecepta Decalogi exordium fuerunt sermonis Dei. Praecepta novi Testamenti completio sunt sermonis Dei. Prohibitio porcinae carnis elementum fuit sermonis Dei. Prohibitio moechiae carnalis, exordium; prohibitio spiritualis moechiae, completio. In Veteri Testamento iterum quando dictum est: Carnem cum sanguine non comedetis (Gen. IX), elementum fuit; quando dictum est: Non occides (Exod. XII), exordium; quando dictum est: Si quis irascitur fratri suo sine causa, reus erit judicio (Matth. V), completio. In Veteri Testamento vox fuit, in Novo intellectus, in vita aeterna, res. In Veteri Testamento via fuit, in Novo, veritas, in aeternitate, vita. Unde dicitur: Ego sum via, veritas et vita (Joan. XIV). Idem enim et ibi via fuit, et hic veritas est, et illic vita erit.