|
Tres sunt tyranni qui contra nos acies suas producunt: diabolus, mundus,
et caro. In exercitu diaboli militant vitia; in castris mundi prospera
et adversa; in societate carnis desideria terrena. Ex his tribus duo
tertio conjuraverunt ad subversionem nostram. Mundus enim et caro
diabolo auxilium ferunt contra nos: unus est vicinus, alter domesticus.
Mundus enim juxta nos est, caro nobiscum. Idcirco confidit diabolus
magis in auxilio carnis, quia plus nocet domesticus hostis. Diabolum
vincimus, quando suggestionibus ejus resistimus; mundum vincimus, quando
nec appetimus prospera, nec timemus adversa; carnem vincimus, quando
ejus desideria nec exstinguimus in necessariis, nec ad licita relaxamus.
|
|
