|
Oculi ejus in pauperem respiciunt; palpebrae ejus interrogant filios
hominum (Psal. IX). Deus oculos habere dicitur, quia bonorum et malorum
vias jugiter contemplatur. Et quasi sinistrum oculum habet, quando malos
ad damnationem praevidet. Dextro autem aspicit, quando in praescientia
sua bonos ad salutem disponit. Isti oculi palpebras habent, quae
aliquando aperiuntur. Quando in hac vita Deus bonis prospera et malis
adversa tribuit, quasi palpebras levat, quia se videre opera hominum
bona et mala, etiam praesenti retributione, manifestat. Quando vero
bonis adversa et malis prospera evenire permittit, quasi palpebras
clandit quia, dum merita singulorum quodammodo dissimiliter recompensat,
quasi quid factum sit se vidisse dissimulat. Istae palpebrae interrogant
filios hominum, quia inde Deus cor humanum tentat, unde aliquando
similia, aliquando dissimilia, semper tamen justa meritis hominum
recompensat. Item oculi ejus in pauperem respiciunt. Duo sunt, pastor
est lupus; ambo in ovem respiciunt, alter ut rapiat, alter ut custodiat.
Item: Ocuti ejus in pauperem respiciunt; insidiatur lupus in abscondito
quasi leo in spelunca sua. Insidiatur ut rapiat pauperem (ibid.). Oculi
ejus, id est pastoris in pauperem respiciunt, ut servent eum. Hinc est
lupus, hinc est pastor. Ovis in medio est pauper, pastor Deus, lupus
diabolus. Hinc pastor illinc lupus. Nunquam ex uno latere occurrunt. Si
pastor a dextris, lupus a sinistris. A dextris est mihi ne commovear
(Psal. XV). Si pastor a sinistris, et diabolus stet a dextris ejus, et
observat lupus, et cum pastor elongat, lupus appropinquat; cum pastor
redit, lupus recedit. Egredietur diabolus ante pedes ejus. Omne autem
judicium procedit ab ove. Timida [tumida] deseritur, timida visitatur;
deseritur, ne praesumat; visitatur, ne desperet. Ideo: Ne declines in
ira a servo tuo (Psal. XXVI). Et: Velociter exaudi me, Domine (Psal.
CI); Defecit spiritus meus (Psal. LXXVI).
|
|
