|
Igne me examinasti, et non est inventa in me iniquitas (Psal. XVI).
Examen in libra est illud desuper in quo perpenditur ad quam partem
pondus seorsum inclinet. Igne ergo tribulationis justus examinatur, quia
perfecta virtus in adversitate cognoscitur. Valde mali jam examinati
sunt, quia per iniquitatis pondus ad sinistram partem se inclinaverunt.
Valde boni examinati sunt, quia per gravitatem constantiae et
perseverantiam virtutis ad dextram se converterunt. Mediocres adhuc
examinati non sunt quia ad quam partem pertineant humana judicia necdum
discernere possunt.
|
|
