|
Judica, Domine, nocentes me; expugna impugnantes me (Psal. XXXIV).
Nocentes sunt qui voto malignitatis insidiantur. Impugnantes sunt qui
aperte persequuntur. Justus ergo occultos inimicos suos judicari tantum,
id est ad futurum judicium servari, manifestos expugnari, id est in hac
vita etiam puniri postulat ut eorum poena manifesta alios ab iniquitate
retrahat; quos prius eorum malitia per exemplum ad iniquitatem animabat.
Ideo Deus omnipotens manifestas injurias servorum suorum saepius etiam
in hac vita ulciscitur, ut quanti meriti sit apud eum justitia, aperte
demonstretur, quatenus hoc alios ad amorem justitiae accendat: quod ipse
auctor justitiae se eam tantum diligere manifestat.
|
|
