|
Multa fecisti, Domine Deus meus, mirabilia tua; et cogitationibus tuis
non est qui similis sit tibi (Psal. XXXIX). Omnia quae sunt, fecit Deus;
et tamen illa specialiter Deus fecisse dicitur per quae homo ad Deum
revocatur. Illa ergo mirabilia Deus quasi non sua fecit, quorum
admiratio humanam mentem ab amore ipsius avertit. Illa autem mirabilia
quae hominem ad amorem Dei revocant, quia nos illius faciunt, quodam
singulari privilegio ejus dici possunt. Quia igitur superius Psalmista
beatum dixerat qui ad hujus mundi vanitatem non respicit, ubi fructuosa
esse possit admiratio, consequenter adjungit: Multa fecisti tu, Domine
Deus meus, mirabilia tua, scilicet opera restaurationis nostrae; quae ne
in eis fastidium metuas, multa sunt numero; et ne facilitatem contemnas,
profunda in sacramento. Hoc est enim quod cum dixisset: Multa fecisti
tu, Domine Deus meus, mirabilia tua, statim ipsam eorum profunditatem
demonstrare volens, adjunxit, et cogitationibus tuis non est qui similis
sit tibi, ut et multitudo mirabilium varietate delectationem afferat, et
profunditas exercitationem.
|
|
