CAP. LIII. Quas semitas declinaverit Dominus.

Declinasti semitas nostras a via tua (Psal. XLIII). Tu veniens in homine viam nobis per exemplum stravisti, et ab illa via quidquid boni in nobis est per imitationem deduxisti. Vel semitas nostras, id est perplexas, et laboriosas vias nostras, in quibus prius secundum carnem ambulavimus, a vita tua bona declinasti, id est removisti, quia amplius per illas non currimus, postquam in viam tuam directi sumus.