|
Praecepta Dei multis nominibus significantur: Via, lex, testimonia,
mandata, justificationes, judicia, sermones, eloquia, mirabilia,
aequitas, verba, veritas, justitia (Psal. CXVIII). Via dicuntur, quia ea
faciendo pervenimus ad vitam. Lex dicuntur, quia observationum ritu
proposito ligant. Testimonia dicuntur, quia evidenter admonent poenis,
vel promissis, vel praemiis, vel donis contestantia. Mandata dicuntur,
quia facienda indicant. Justificationes dicuntur, quia impleta a reatu
liberant. Judicia dicuntur, quia unicuique pro merito debitam
retributionem pronuntiant. Sermones dicuntur, quia narrando instruunt.
Eloquia dicuntur, quia aperte significant. Mirabilia dicuntur, quia
insolita praecipiunt et incognita promittunt. Aequitas dicuntur, quia
secundum justitiam facta sunt. Verba dicuntur, quia significationes Dei
sunt ad homines. Veritas dicuntur, quia ita est ut dicunt. Justitia
dicuntur, quia nihil inordinatum continent.
|
|
