CAP. LXXVI. Quis in mandatis Dei exerceatur.

In mandatis tuis exercebor (Psal. CXVIII). Exercetur qui praesenti studio ad meliora et futura bona eruditur. In mandatis ergo Dei exercetur, qui sic semper bona quae agit, considerat, ut per ea se ad bona agenda quae necdum coepit praeparari credat, ut se non quasi consummatum existimet, sed semper quasi incipientem attendat.