|
Secundum multitudinem impietatum eorum expelle eos (Psal. V). Intus est
peccator, quandiu iniquitatem suam abscondit, quando autem confitetur
iniquitatem suam, foras venit. Nunc ergo vocat Deus Lazarum, et
praecipit ut foras veniat, quia monet peccatorem, ut peccatum suum
revelare non erubescat. Sed quisquis in hac vita sponte exire noluerit,
in futuro expelletur invitus, quia qui hic peccatum suum revelare
neglexerit ad salutem, ejus peccatum ibi, velit nolit, revelabitur ad
confusionem, sicut dicitur in alio psalmo: Arguam te, et statuam contra
faciem tuam (Psal. XLIX).
|
|
