|
In Jordane, id est in descensu humilitatis Christi qui septemplicis
virtutis est, septies si lavaberis, mundaberis. Prima virtus fuit quod
dives pauper factus est; secunda, quod paupertati extremitatem adjecit
in praesepio positus; tertia, quod matri erat subditus; quarta quod
servi manibus hodie inclinavit caput; quinta quod discipulum furem et
proditorem pertulit; sexta, quod tam mansuetus ante iniquum judicem
stetit; septima quod pro persequentibus se oravit. In hoc Jordane
septies lavaris quasi quibusdam vestigiis, licet longe gigantem secutus;
si paupertatem diligis, si inter pauperes extremitatem diligis, si
monasterii subditus es diciplinis, si minorem ibi praeesse tuleris, si
falsos fratres aequanimiter pateris, si mansuetudine vincas cum
judicaris, si charitatem rependas a quibus juste pateris. Hoc est
secundum baptismum in quo impletur veritate quod in unico fit specie,
quod mortem Christi iterat, sed mortificationem et sepulturam criminum
instaurat. Qui in hoc lavatur, mundatur, ut sit cor et caro ejus sicut
pueri habens intus innocentiam mentis, et foris puritatem in membris.
|
|
