|
Filium viduae qui aegrotaverat et mortuus est in sinu ejus, ut suscitet
Elias tollit de sinu ejus in coenaculum, ponitque in lectum: ubi ter eum
corpore suo mensus per orationem suscitat (IV Reg. IV). Filius moritur
in sinu matris, dum spiritus moritur in delectatione pravae
conversationis. Unde et in sinu uxoris Samson caecatur. Hic ut vivat
prius removetur a sua vana conversatione, quia prius est relinquendum
malum. Inde portavit in coenaculum Ecclesiae, id est monasterii, ubi
habitat Deus. Ibi in lecto contemplationis positus super se ter Deum
sentit mentiri, dum mente, ore et opere, Deum recipit, nulla cogitans,
loquens, aut operans nisi quae Dei sunt, ut jam vivat in virtutibus, et
quiescat non in agro, non in molendino, sed in lecto illius pacis quae
hic incipit, in futuro consummatur. Item sciendum quod vidua haec animam
significat, de qua dicitur: Pavit sterilem, et viduae non benefecit (Job
XXIV). Quod est carnem a fructu boni operis sterilem nutrire, et animae
non providere, cujus maritus Christus est mortuus. Hujus viduae sinus
est caro, filius opus est. Qui moritur in sinu, id est in carnis
delectatione, sed praedicto modo eum suscitat Elias.
|
|
