|
Goliath David, diabolus Christum, superbia provocavit humilitatem.
Contra Goliam David, id est Christus, induitur armis (I Reg. XVII),
circumcisione scilicet, templi figuris, et multiplicibus sacrificiis.
Sed quia arma prementia non adjuvantia erant, deponuntur. Lapides
quinque accipiuntur. Deponitur lex et accipitur lex. Deponitur lex
figurativa, accipitur figurata, dimittitur quod velabat; nam in morte
Domini velum templi scissum est (Matth. XXVII): et quod velabatur
accipitur. Accipiuntur quinque lapides, id est libri de flumine prioris
populi, ubi vacabant et inutiles erant semper; quos fluvius
transgressione transibat. Mittuntur in peram pastoralem, id est in
caulam boni pastoris Christi, ubi lacte gratiae abundant oves; nam sine
gratia lex intelligi et impleri non poterat. Hoc lac mater Ecclesia
satagit dare; sed infidelis non quaerit accipere, dolet illa, si cui det
non invenit. Lapidibus quinque torrentis gratiae armatus uno stravit,
quia quinque libri aperti sunt, sed in eis unitas charitatis vincit. In
quinque enim porticibus multi jacebant languidi, sed unus sanabatur. Nam
nisi charitas, ex qua lex et prophetae, vincere non potest. Deinde
proprio illi gladio caput abscidit. Gladius enim diaboli sunt mali,
scilicet membra ejus quibus contra Deum et ejus membra pugnat. Hunc de
vagina diaboli extrahit David noster, cum de potestate malorum Christus
membra sua diripit. Sed per illum diaboli caput abscidit, quando ipsum
per Evangelii praedicationem a suis membris ejicit.
|
|
