TIT. CXXII. De mutatione vestis sacerdotalis.

Cum personis supervenientibus animum mutare ordini sacerdotum valde est necessarium. Unde per prophetam dicitur, ut cum sacerdos intus ministrat, vestibus lineis utatur (Ezech. XLIV); cum egreditur ad populum, reponantur eae in gazophylacio sanctuarii (ibid.). Cum enim sacerdos intro ingreditur, subtilioribus contemplationis operibus quasi lineo indumento utatur. At cum ad populum egreditur grossioribus utatur, quia pro utilitate etiam ad terrena portanda mores suos componere debet.