|
Posuerunt signa sua, signa, etc. (Psal. LXXIII). Omnes qui pie volunt
vivere in Christo Jesu persecutionem patiuntur (II Tim. III). Hinc
Jerusalem civitas plena populo, domina gentium, princeps provinciarum,
sedet sola vidua sub tributo. Primo ab Assyriis, secundo a Chaldaeis,
tertio ab Antiocho, quarto expugnata a Romanis. Jerusalem quadrifariam
habet significationem. Prima, civitas ista terrena; secunda, Ecclesia
Catholica. Tertia, fidelis anima; quarta, quae sursum est mater nostra.
Terrenam impugnant praefati homines. Secundam idololatrae et falsi
Christiani. Tertiam vitia, peccata, daemones. Hujus vitiis expositae,
peccatis conculcatae, daemonibus oppressae, obsidionem propheta deplorat
dicens: Posuerunt signa specialiter Assyrius, Chaldaeus, Antiochus,
Romanus. Assyrius interpretatur dirigens, in quo superbia notatur. Hic
ponit duo signa arrogantiam et praesumptionem. Chaldeus ferox, in quo
inobedientia; et hic duo, jactantiam et impatientiam. Antiochus
contrarius pudicitiae in quo fornicatio signatur; et hic duo, crapulam
et ebrietatem. Romanus elationis sapor, qui est avaritia, hic est
tanquam singularis ferus, qui ut omnia depascat, quinque signa ponit;
rapinam, simoniam, ambitionem, libertatem culpae, desperationem veniae.
Hi igitur spiritus vitiorum, principes tenebrarum circumdant Jerusalem,
id est animam, ponunt vexilla praedicta, portas custodiunt.
|
|
