|
Super tribus sceleribus Gazae et super quatuor non convertam illum
(Amos. III). Septem sunt scelera: tria sunt in anima, quatuor in
corpore. Tria in anima, superbia, vana gloria, invidia, provenientia ex
corruptis tribus viribus animae, dum rationalitas in superbiam,
concupiscibilitas in vanam gloriam, irascibilitas vertitur in invidiam.
Quatuor in corpore sunt: curiositas in oculis, loquacitas in lingua,
crudelitas in manibus, voluptas in lumbis; nam cum homo constans ex
quatuor elementis ab igne lumen, ab aere verba, a terra corpulentiam, ab
aqua naturalium percipiat humorum abundantiam, ex insolentia visus
nascitur curiositas, ex levitate linguae loquacitas, ex solidate
corpulentiae crudelitas. Unde bruta animalia, magis dedita corpori,
magis sunt crudelia. Ex humore naturali, fit fluxus luxuriae. Sic itaque
tria in anima, quatuor in corpore vitia tres et quatuor faciunt
corruptiones, super quibus obstinatur, non convertitur peccator.
|
|
