|
Qui sunt isti qui ut nubes volant, et quasi columbae ad fenestras suas?
(Isa. LX.) Tria pastoribus gregis Domini sunt necessaria: bona operatio,
discretio, praedicatio, ut sint lux, oculus et sal. Lux bonae
operationis, ut exemplo luceant. Unde: Luceat lux vestra coram hominibus
(Matth. V). Oculus discretionis ut discernendo inter lepram et lepram
provideant subditis. Unde ad Ezechielem: Speculatorem dedi te domui
Israel (Ezech. III). Sal praedicationis et correctionis ut praedicatione
subditos erudiant, ne vermes peccatorum eos consumant. Unde: Vos estis
sal terrae (Matth. V). Ex pastoribus autem aliqui sunt nec sal, nec lux,
nec oculus, qui scilicet male praedicant, male operantur, male
discernunt. De quibus dicitur: Sacerdotes contempserunt legem meam,
polluerunt sanctuaria mea (Ezech. XXII); quia inter sanctum et profanum,
scientiam et ignorantiam, inter lutum et mundum non intellexerunt. Alii
sal et non lux. De quibus dicitur: Quae dicunt facite; quae faciunt,
facere nolite (Matth. XXIII). Alii sal praedicationis non habent. De
quibus dicitur: Canes muti, non valentes latrare (Isa. LVI). Haec ergo
tria nobis necessaria sunt, ut simus lux, oculus, sal. Quorum si vel
unum defuerit, gregem Domini periculose servamus. Si enim non sumus lux,
licet simus oculus et sal, cum periculo corpus Domini tractamus, officio
indigni sumus, facti sicut habentes clavem, aliis aperientes, sed non
intrantes. Unde valde timendum ne nos qui coeli janitores sumus, cum
alios intromiserimus, ipsi non intremus, et clausa tandem janua frustra
clamemus: Domine, Domine, aperi nobis (Matth. II). Fiat quoque illud ut,
cum ejecerit de templo Jesus ementes et vendentes (Matth. XXI), accedant
ad eum et intrent caeci et claudi. Si autem oculo discretionis qui debet
esse columbarum non corvorum. Unde: Oculi tui columbarum (Cant. I)
carent, tunc caecus caecum ducat, et ambo in foveam cadent (Matth. XV).
Si sale careant praedicationis, tuncque jejunus deficiat in via populus
Dei, sanguis ejus de manu praedicatoris requiratur. Consideret ergo
unusquisque onus suum, ut sit per sal nubes compluendo; per lucem,
volans ad coelestia, quod verbo praedicat exemplo monstrando; per
oculum, columba ad fenestras Scripturae, ut per ipsas Deum videndo
ovibus suis provideat. Talibus enim congaudens ait propheta: Qui sunt
isti qui ut nubes volant et quasi columbae ad fenestras suas? Pensate
igitur quid estis, et ad quod ministerium in domo Dei vocati. Clamat
secus agentibus Oseas dicens: Audite, sacerdotes, quia vobis judicium
est (Ose. V). Et quare, ostendit subdens: Quoniam laqueus facti estis
speculationi et rete expansum (ibid.): Quasi dicat: Quoniam vos qui
expedire debetis, malo exemplo alios illaqueatis, judicium est vobis
damnationis. Unde et alterius sanguinis rei.
|
|
