|
Memento Creatoris tui in die juventutis (Eccle. XI), ait Sapiens, ut,
juxta Apostolum, dum tempus habemus, operemur bonum ad omnes (Gal. VI).
Sequitur: Antequam rumpatur funiculus argenteus (Eccle. XII), id est
dissolvatur corpus et recurrat vita aurea. id est anima vinculis carnis
absoluta ad Deum qui fecit illam, punienda vel salvanda. Funis dicitur
corpus, quia quibusdam legibus naturae sibi animam legat, antequam
pulvis, id est homo qui de terra factus est conteratur super fontem, id
est mundum, ut inde aquam non possit haurire, et rota cogitationum quae
de corde exeunt et volvuntur et revolvuntur super cisternam corporis,
quia in illa die peribunt cogitationes. Hoc idem subdit aliis verbis: Et
revertatur pulvis in terram suam, unde erat (pulvis es et in pulverem
reverteris [Gen. III]), et spiritus redeat ad ipsum qui dedit illum
(Eccl. XII), recepturus poenam vel gloriam.
|
|
