|
Quis ascendet ante nos contra Chananaeum, etc. (Judic. I.) Tripartita
invenitur Chananaei narratio. Primo in Ephrem sub tributo, donec veniens
Pharao incederet civitatem et Chananaeum occideret, et in dotem daret
filiae. Secundo, ubi invaluerunt filii Israel, fecerunt Chananaeos
subditos et servos, sed exterminatione non exterminaverunt. Tertio
dicitur filiis Ephrem, inter quos prius erant tantum sub tributo, ut
exterminarent eos. Chananaeus igitur, qui mobilis et incertus
interpretatur, caro nostra est, semper nobiscum quantumcunque
fructificans. Ephrem enim fructificatio interpretatur. Haec igitur
movetur contra bonos fructificare incipientes, quia omnis qui pie vult
vivere persecutiones et a carne et a mundo et a diabolo patitur (II Tim.
III), quia caro primo est sub tributo tantum, quia ministerium quoddam
agendi animae tribuit, et nisi eam subjiciat, verendum ne Pharao et
civitatem, id est animam, et Chananaeum, id est carnem, occidat, et
filiae suae, id est legi peccati in dotem praescribat. Secundo itaque
invalescentes filii Israel illum servum et obedientem faciunt, cum caro
voluntati animae servit et obedit. Licet repugnet, quandiu pugnat
adversus spiritum, exterminatione non exterminatur. Si autem tertio ex
praecepto Jesu, juxta Apostolum, mortificamus membra nostra,
fornicationem, immunditiam et caetera, ut jam non resurgant contra nos,
mortem Christi in corpore nostro circumferentes, exterminari prorsus
dicitur Chananaeus. Procuremus itaque Chananaeum qui nobiscum est
subjicere nobis, et obedientem facere, et etiam exterminare, quia, si
negligimus, veniet Pharao ex Aegypto, nostrumque locum dabit filiae,
legi scilicet peccati. Absit ab Israelitica tribu, ut quam Deus eduxit
ab Aegypto iterum serviat Pharaoni, quem submersit in mari Rubro!
Praevaleamus contra Chananaeum, ne si ipse invaluerit, de Israelitis nos
faciat Chananaeos, sicut ille effectus est cui superato carnis illecebra
dicitur: Semen Chanaam, et non Juda species decepit te (Dan. XIII).
Sequitur: Maledictusque Chanaam puer.
|
|
