TIT. LVI. De expositione sacrae Scripturae.

Si intraveris segetem proximi tui franges spicas et manu conteres; falce autem non metes (Deut. XXIII), hoc est evelles sententias manu intelligentiae, conteres granum ab arista, spiritum secernens a littera. Falce autem non metes, quod est facile et subito librum transcurrere. Sufficit paucos manipulos per dies colligere. Sunt qui falce metunt, qui totum subito librum legentes nihil intelligunt. Ingressus vineam proximi tui, id est Scripturam Dei tui, comedas uvas, id est sententias quantum tibi placuerit; foras autem non efferas tecum (ibid.), quia non est dandum sanctum canibus neque ponendae margaritae ante porcos (Matth. VII).

Frumento, vino et oleo stabilivi eum (Gen. XXVII). Divina Scriptura in quibusdam locis quasi panis difficile editur, in quibusdam sicut vinum facile sorbetur, in omnibus quasi medicamentum et oleum animae, dum sumitur, medetur.