|
Omnia primogenita in lege sunt sacerdotum immunda redimuntur, munda non,
sed offeruntur. Quorum sanguis super altare funditur, pectusculum et
armus est sacerdotum (Num. XVII), quia fides sacerdotum ministerio Deo
offertur. Aliter enim nemo baptizatur, nisi prius fides quae est
primogenitum sacerdotibus offeratur. Immundum redimitur, quoniam anima
violata poenitentiae pretio restauratur. Munda non redimuntur, quia quod
liberum est redemptione non indiget. Sanguis super altare funditur.
Pectusculum et armus sunt sacerdotum, quoniam sic ad eos pertinet
ipsorum vitas praedicare ut consilia dare et onera portare sufficiant.
|
|
