TIT. LX. De diligentibus et timentibus Deum, et de confitentibus Deo.

Recti diligunt te (Cant. I). Hominum alii sunt jacentes, alii curvi, alii recti. Jacentes sunt qui nec timent nec diligunt Deum; curvi, qui timent et non diligunt; recti, qui timent et diligunt. Quidam sunt qui confitentur Deo, quia eos bene pascit. Unde in psalmo: Confitebitur tibi, cum benefeceris ei (Psal. XLVIII). Istis jacentes in luto peccati Deum nec timent nec diligunt. Alii sunt qui confitentur Deo quoniam sciunt esse potentem ponere corpus et animam in gehennam; isti timent et non diligunt. Alii Deo confitentur propter ipsum, quia solus bonus est, dulcis et magnae misericordiae; non timore, non cupiditate, sed confitentur quoniam bonus. Primi sunt mercenarii, secundi servi tertii filii. Mercenarius cupit sibi, servus timet sibi, filius diligit. Unusquisque habet legem suam. Mercenarius cupiditatem, qua constringitur; servus timorem, quo arctatur; filius charitatem, quam complectitur.