|
Cognovisti omnia novissima et antiqua (Psal. CXXXVIII). Novissimum:
Verbum est caro factum (Joan. I); antiquum: In principio erat Verbum
(ibid.). Haec sunt nova ad vetera, et veterum vetustissima, de quibus in
Levitico: Vetustissima veterum comedetis: et novis supervenientibus,
vetero projicietis. Vetera sunt promissiones legum et prophetarum de
venturo Christo. Nova sunt promissionum impletio, veritatis exhibitio.
Vetustissima, quae ad divinitatis aeternitatem pertinent. Novis ergo
supervenientibus, vetera sunt projicienda, et vetustissima servanda,
quia exhibita veritate Dominici adventus figura et promissio cessare
debent, novumque incarnationis et vetustissimum aeternitatis Verbi
credendo et colendo tenendum. Unde tres in Natali missae celebrantur.
Prima de aeterna genitura: Dominus dixit ad me. Secunda, de promissione
adventus: Lux fulgebit. Tertia de impletione promissionis: Puer natus
est nobis. Et quia ille idem qui est Dei Filius, factus est hominis
filius, ideo in illius missae officio ubi cantatur de aeterna Christi
genitura: Dominus dixit ad me, legitur Evangelium de temporali Christi
nativitate: Liber generationis Jesu Christi (Matth. I); et in missa ubi
cantatur de temporali nativitate: Puer natus est nobis, legitur
Evangelium de aeterna generatione: In principio erat Verbum (Joan. I).
Et quia veritate exhibita figurae cessant, non officium quod pertinet ad
promissionem, sed quod ad impletionem sequentibus diebus repetitur,
scilicet. Puer natus est nobis. Haec novissima et antiqua quae Pater
novit, et cui Filius voluerit revelare.
|
|
