|
Omnis consummationis vidi finem. Latum mandatum tuum nimis (Psal.
CXVIII). Finis consummationis est plenitudo dilectionis. Finis qui
consumit et consummat. Consumit tria iniquitatem vitiorum mentis et
peccatorum carnis, vanitatem mundi, et calamitatem carnis. Consummat
tribus: perfecta puritate, angelica parilitate, aeterna felicitate. Hoc
mandatum latum est nimis, quia ex quo interiorem possidet hominem, nec
cogitationem agitat vanitas, nec affectionem impuritas maculat, nec
intentionem iniquitas angustat, sic Deus optat a nobis amari. Dilige,
inquit, Dominum Deum tuum ex toto corde tuo, et ex tota anima tua (Deut.
VI), ut sit cogitatio sana, affectio pura, intentio recta. Diliges,
primo, quia te condidit, secundo quia redemit, tertio quia glorificabit,
ex operibus scilicet conditionis, redemptionis, glorificationis. In
primo te creavit ex nihilo et ratione praeditum fecit. In secundo
liberavit a maledicto, et a concupiscentia sanavit. In tertio te
angelorum sociavit consortio, et limpidissimae memoriae patravit.
|
|
