TIT. VIII. De trecentis qui bibentes aquam fluvialem non curvaverunt genua.

Post acceptum signum, in quibus vicerit Gedeon noster videamus. In illis enim vicit qui ducti ad aquam probantur, qui non curvant genua ut bibant, sed lambunt manu vel lingua (Judic. VII). Nam qui venientes ad aquam baptismi vel poenitentiae procidunt in terram, terram requirendo, flectunt genua et tentationibus cedunt, demissas habentes affectiones et soluta genua et non rectum facientes gressum in semitis suis, ab hac pugna repelluntur et victoria. Qui vero stant et iterum, juxta commonitionem Apostoli, non haerent jugo servitutis, sed aquam manu et lingua lambunt, id est sicut milites Christi, verbo operantur et manu, quod dicunt opere adimplentes. Ex hoc sicut canis, qui amorem domini sui usque ad mortem servat, nullis refectus injuriis. Laternis et lampadibus ac buccinis hostes vincunt. Claris siquidem operibus et verbis id peragendum. Et similitudo hostium sumitur a similitudine locustarum. Locustis enim daemonum comparatur multitudo, quibus nec in coelo nec in terra sedes est.