TIT. LXXX. De fonte patente et occulto, Christo scilicet Domino nostro.

In die illa erit fons patens domui David et habitantibus Jerusalem in ablutionem peccatoris et menstruatae (Zach. XIII). Fons occultus Unigenitus est Patris invisibilis. Fons idem patens Deus incarnatus, qui fons patens domui David dicitur, quia ex David genere ad nos Redemptor processit. In Jerusalem habitavit, quia in visione pacis intimae. Mentem autem peccatricem significant peccator et menstruata; vel peccator eum qui delinquit opere, menstruata mentem quae labitur prava cogitatione. Nam sicut menstruata est polluta quae aliena carne non tangitur, et sua inquinatur, sic anima, etsi malum opus non peragit, polluta tamen immunda cogitatione sordescit. Unde: Omnes qui quaerunt eam non deficient, in menstruis ejus invenient eam (Jer. II), quia maligni spiritus in illa bonae cogitationis rectitudine repelluntur, cum in pollutis cogitationibus positam facile ad perversam cogitationem trahant, In die igitur illa, etc., quia apertus est jam nobis fons misericordiae, Redemptor noster qui in domo David incarnatus peccatorem lavat a perverso opere, et menstruatam mentem diluit a foeda cogitatione. Pater igitur fons, curramus cum lacrymis, lavemur hoc fonte pietatis. In hoc fonte David, lotus per poenitentiam a gravi macula culpae, quaerebat hunc, cum diceret: Redde mihi laetitiam salutaris tui (Psal. L), id est Jesu. In hoc fonte misericordiae lota est Maria Magdalene, Petrus et latro. Cur ergo pigri sumus? Cur torpentes et frigidi remanemus, qui in hoc fonte pietatis tantos se lavisse cognoscimus? Ergone de mundatione nostri desperemus, qui tot exempla misericordiae in pignore tenemus? Quaerere misericordiae fontem deberemus, si clausus esset, nunc vero patet, et negligimus. Mittamus oculos fidei in mundum universum, consideremus quam multi hodie in hoc fonte laventur, quam multi post lacrymas ad munditiam redeant. Curramus cum talibus ad aquam vitae, consideremus quantum peccavimus; atque ut appareamus mundi, cor nostrum illi lavemus in holocaustum, adjuvante nos ad haec eadem gratia Redemptoris Domini nostri qui vivit et regnat, etc.