TIT. LXXXVII. Ut speciem suam visitet quisque.

Visitans speciem tuam non peccabis (Job V). Species hominis est sicut homo. Speciem ergo suam visitat quisquis ad eum quem similem per naturam conspicit, passibus amoris tendit, et in altero sua considerans, ex seipso colligit qualiter infirmanti alii condescendat, qui ut in se alterum reficiat, se in altero pensat. Unde Moyses: Tulit terra lignum habens sementem secundum speciem suam (Gen. II). Terra, inquam, benedicta, ante peccata; nam post maledicta spinas dat et tribulos.