TIT. XCI. De abscondente frumenta.

Qui abscondit frumenta maledicitur in populis (Prov. XI). Frumenta abscondere est praedicationis verba apud se retinere. In populis maledicitur talis, quia in sola scientia pro multis quos corrigere non potuit culpa damnatur. Unde: Maledictus qui prohibet gladium suum a sanguine (Jerem. XLVIII), id est praedicationis verba a carnalis vitae interfectione.