|
Si quis Domini est jungatur mihi. Ponat vir gladium suum supra femur
suum. Ite, redite de porta usque ad portam per medium castrorum, et
occidat unusquisque fratrem et amicum et proximum suum (Exod. XXXII).
Proximus est hominis homo, conditione originis. Item est amicus
dilectione et frater in spiritu vel carne. Qui istos ita delinquentes
gladio vult increpationis in vitiis occidere, gladium prius supra femur
suum ponat, id est illicitas prius in se suggestiones studeat edomare;
et tunc de porta eat ad portam, id est a vitio usque ad vitium per quod
ad mentem mors ingreditur, increpando discurrat per medium castrorum cum
tanta aequalitate, ut in culpam delinquentium nullius odio vel favore
declinet.
|
|
