TIT. XCIII. De adulatione perniciosa.

Vae qui consuunt pulvillos sub omni cubito manus, et faciunt cervicalia sub capite universae aetatis ad capiendas animas! (Ezech. XIII.) Pulvillus et cervical ut melius quiescatur ponuntur. Quisquis autem male agentibus adulatur, sub capite et manu alterius consuit pulvillos. Hinc rursus: Ipse aedificabat parietem, et alii liniebant (ibid.). Paries peccati duritia. Hunc aedificat qui contra se peccati obstaculum construit; hunc linit qui peccata perpetranti adulatur.