TIT. XVI. Quomodo nobis sit facies per humilitatem velanda exemplo Eliae.

Elias, ut vocem Dei secum loquentis audiret, in ostio speluncae suae stat et velat faciem (III Reg. XIX), quia cum vox intelligentiae supernae fit in mente, totus homo jam intra speluncam non est, quia mente carnis curam non possidet, sed stat in ostio, quia mortalitatis miserias exire meditatur. Sed tali necesse est ut faciem velet, quia quanto ad altiora intelligenda levamur, tanto nos submissius per humilitatem poenitentiae premere debemus, ne plus sapere quam oporteat conemur.