|
Egressa est Dina ut videret mulieres regionis (Gen. XXXIV). Egreditur
anima per aures, per oculos, ut ludat cum filiabus perditionis. Hanc
Dominus revocat dicens: Revertere, revertere, Sunamitis, etc. (Cant.
VI). Quater dicit, revertere. Ac si dicat: Revertere a meis, quia
mirabilia sunt; a tuis, quia prava sunt; a te, quia omnis caro fenum; ad
me, quia summum bonum ego sum. Sic ergo Deus vertit faciem a me, quia
illi obverti tergum. Ideo, inquit, ut intueamur te, quasi dicat: Non
potes me videre, nisi prius intueamur te. Nescio quid maculae habes in
facie; turpis es, alienam imaginem portas. Munda ergo eam ut intueamur
te.
|
|
