|
Tres sunt species basium in Scripturis; aenea, argentea, aurea (Judic.
XIV). Prima fortitudinem, secunda cum fortitudine claritatem, tertia cum
fortitudine et claritate habet fulgorem. Fortitudinem in opere,
claritatem in sermone, fulgorem in mente, quia in his tribus patientiam
servat, quam basis indicat aenea; claram veritatem, quam basis argentea;
et conscientiae fulgorem, quam basis aurea; quae virtutum structuram
portat omnium. His tribus usus est Moyses.
Si non arassetis in vitula mea, non invenissetis propositionem meam
(Jud. XIV). Vitula est caro lasciva, propositio, obscura locutio.
Samson, qui sol eorum dicitur, typum tenet Solis justitiae; illius
sodales, typum studentium sapientiae. Dicit ergo: Si non arassetis in
vitula mea, etc. Ac si dicat: Nisi caro restringatur et fiat sobria,
mens nequaquam se valeret erigere ad coelestia. In vitula aratur, cum
caro mortificatur. Invenitur problema, cum coelestium arcanorum aperitur
contemplatio. Sodales igitur Samsonis vitulam diligenter exarant, ut
aenigma propositionis intelligant, quia veritatis amici Jesu Christi
discipuli carnem sobrie macerant, corpus attenuant, ut obscura scientiae
intelligant, et arcana scientiae penetrare valeant. Est igitur magni
momenti abstinentia, qua purgantur vitia, impetratur venia, possidetur
gratia, reparatur innocentia, arcana patefiunt coelestia. Abstinentia
vero quadrifaria est, vitiorum, ciborum, negotiorum immundorum et
desideriorum. De his in Zacharia: Jejunium quarti et jejunium quinti, et
jejunium septimi et jejunium decimi erit domui Judae in gaudium et
laetitiam et in solemnitates praeclaras, etc. (Zach. VIII).
|
|
