|
Tondebatur Absalon semel in anno, quia gravabat eum caesaries; et tunc
crines ponderabantur ducentis siclis pondere publico (II Reg. XIV).
Appetitus carnis caesariem nutrit et producit, quia cogitationum
superflua nutrit: quae caesaries gravat mentem dum deprimit terrena
inhabitatio sensum multa cogitantem (Sap. IX). Qui tonsus semel in anno
ducentis siclis ponderat, quando in omni spatio vitae suae cupiditatibus
saeculi renuntiat, et hoc in fine. Tunc enim ab iis quae possidet
spoliatur, quando morte ultima terrenis separatur. Ponderat autem plus
terra quam coelum; plus amant esse in domo lutea quam in non manu facta
in coelis, in transitoria quam aeterna. Et hoc pondere publico non
sanctuarii. Audi pondus sanctuarii, pondus Pauli. Cupio dissolvi et esse
cum Christo (Philip. I). Audi pondus publicum. Vae habitantibus in terra
(Apoc. VIII). Non qui corpore, sed qui corde habitant.
|
|
