|
Rorate, coeli, desuper, et nubes pluant justum (Isa. XLV). Ros de coelo
descendit in terram sine sonitu, pluvia de nubibus cum strepitu.
Christus est ros, Christus est pluvia. In hac vita Christus est ros
gratiae, in gremio misericordiae peccatores collocando. In die judicii
erit pluvia, super impios cum strepitu saeviendo. Christus est ros. O
peccator, ad spem ascende. Christus est pluvia: O superbe, a tribunali
cordis tui descende. Rorate, coeli, desuper. Coelum Pater et Filius et
Spiritus sanctus, trinus et unus. Rorent ergo coeli. Quasi dicat: Pater
ut Filius ad nos veniat cooperetur, et Spiritus sanctus ut Filius nos
redimat. Nubes pluant justum. Nubes sunt prophetae. In his nubibus
ligatus et suspensus justus, quia in verbis prophetarum ante
incarnationem clausus est Christus. Sed rogat genus humanum ut nubes
pluant justum, quia tempus faciendi ut ante conspectum gentium revelet
justitiam suam in nubibus pluviam.
|
|
