|
Producens nubes ab extremo terrae, fulgura in pluviam fecit, etc. (Psal.
CXXXIV). Terrae nostrae extrema peccata infima et opera abjecta. A tali
extremitate nubes producitur; quia ex turpitudinis nostrae recordatione
caligo confusionis generatur. Nubes hujusmodi dum mentem obnubilat
contra concupiscentiae aestus quasi contra solis ardores refrigerium
praestat. Nam qui peccasse se meminit, et se peccasse erubescit, quanto
magis de praeterito dolet, tanto de futuro se cautiorem reddit. Fulgura
in pluviam fecit. Ante fulgura nubes producitur; post fulgura pluvia
sequitur. Nubes caligo confusionis; fulgura, terror majestatis; pluvia
fetus compunctionis. Dispensata ergo divina pietate, prius ob mentis
oculos turpitudinis nostrae memoria reducitur, post, mens recordatione
divini terroris formidine concutitur; tandem, inter confusionem et
formidinem deprehensa et diu fatigata in fletu compungitur. Nubem super
me aspexi, quotiescunque confusio faciei meae cooperuit me (Psal.
XLIII): fulgura excipio quando terrores Domini militant adversus me;
pluvia descendit, quoties potui lectum meum rigare lacrymis.
|
|
