|
Tres sunt panes Salomonis: Contemptus mundi, et sui, et amor Dei. Primum
proponit in Ecclesiaste, secundum in parabolis, tertium in canticorum
Canticis. Quia enim duo sunt mala, quae sola maxime militant adversus
animam, vanus scilicet amor mundi, et superfluus amor sui, pessimi
utrique duo isti priores sibi obviare noscuntur. Quia vero unum solum
summum bonum, quo frui et quod amplecti desiderat sponsa, Deus scilicet
sponsus est, hic in tertio, id est canticis frangi dignoscitur. In primo
igitur, ad refectionem nostri docemur hujus mundi contemnere vanitatem;
in secundo cognoscere et sequi veritatem, sequi scilicet Agnum quocunque
ierit; in tertio, veritate frui et ad ipsum pervenire: et hic est
fructus amborum priorum. Cum tertium istum sumpserit panem qui de via
venit amicus, unde murmuret non habebit. Sed quis franget? Adest
paterfamilias cognoscendus Dominus in panis fractione (Luc. XXIV),
pauper et inops ad eum pulset, quia aperit et nemini claudit.
|
|
