TIT. LXX. De quatuor montibus.

Quatuor sunt genera montium: Montes Gelboe, ubi gladius Saul repellitur: hi sunt viri fortes in Ecclesia, in quibus insidiae diaboli repelluntur; montes Israel, qui multum extenduntur; hi sunt apostoli quorum sonus in omnem terram exivit; montes Samariae, qui in aera eriguntur: hi sunt haeretici, qui ponunt in coelum os suum; quarti montes saeculi, de quibus propheta: Contriti sunt montes saeculi (Habac. III); sunt divites et potentes mundi, quorum potentiae multis modis conteruntur.