|
Tres sunt hominis patres: Primus gignit, secundus rapit, tertius
requirit. Primus gignit ad vitam carnis, secundus rapit ad poenam
mortis, tertius requirit ad gaudium aeternitatis. Primus pater est homo,
secundus diabolus, tertius Deus. De primo: Crescite et multiplicamini
(Gen. I). De secundo: Vos ex patre diabolo estis (Joan. VIII). De
tertio: Pater noster, qui es in coelis (Matth. VI). Sub primo carnaliter
vivimus, sub secundo mortaliter delinquimus, sub tertio feliciter
regnamus. Et monet tertius ut relinquatur primus, nec imitetur secundus.
Duorum priorum patrum domum praecipitur filiae oblivisci cum dicitur, et
domum patris tui (Psal. XLIV).
|
|
