|
Quatuor superat fidelis anima: Mundum, carnem, mentem, diabolum. Bella
mundi sunt forinseca, carnis domestica, mentis intestina, diaboli
fraudulenta. O quam difficile acquiritur victoria, ubi tanta est
resistentium turba? Verum in victoria concupiscit rex decorem victricis
animae. Qui triplex est: In voce quia pulchra loquitur; in facie, quia
bona operatur; in corde, quia sancta meditatur. Et ideo dicit ei: Tota
pulchra es, amica mea, et macula non est in te (Cant. IV). Et ideo surge
de labore ad requiem, de mundo ad gloriam, de certamine ad praemium et
veni in thalamum nuptialem, in quo eris sponsa cum ipso sine fine.
|
|
