TIT. XIV. De duplici oleo, Dei scilicet et mundi.

Duplex est oleum. Habet enim oleum Deus, habet oleum et mundus. Oleo Dei vasa deficiunt, oleum mundi in vasis deficit. Oleum Dei dulcedo est aeternorum, oleum mundi, delectatio praesentium. Illa sufficit, ista deficit. Unde vasa stultarum virginum vacua esse dicuntur (Matth. XXV); vasa viduae sapientis plena (IV Reg. IV). Vasa corda sunt, oleum gaudium.