TIT. XXVI. De tribus panibus quibus reficiendus est superveniens amicus.

Tribus panibus reficiendus est superveniens amicus. Primus panis est continentia, qua restringitur corpus ne per mortiferas delectationes effluat. Secundus, humilitas, qua instruitur anima, ne de ipsa corporis sui continentia superbiat. Tertius, charitatis fervor, quo accenditur spiritus ut utrumque, id est corpus et animam in castitate et humilitate custodiat perseveranter. His tribus virtutibus reficitur homo Dei et roboratur, ut, secundum Apostolum, in die adventus Domini sit integer spiritus anima et corpus (I Thess. V). Hi panes quoties deficiunt a Deo quaerendi sunt. Merito autem tres quaeruntur, quia tres reficiendi sunt; anima tanquam vir; caro tanquam uxor; spiritus velut utriusque vernaculus. Et nota quod non ait da, sed accommoda (Luc. XI), quia fructum ejusdem gratiae non sibi, sed Deo debet semper acceptum referre.