|
Cum gustasset architriclinus, etc. (Joan. II). Tria sunt in conjugio.
Sacramentum religionis, de quo Apostolus: Sacramentum hoc dico magnum,
etc. (Ephes. V.) Officium purgationis; unde: Maledictus qui non
reliquerit semen super terram. Remedium fornicationis; unde: Unusquisque
habeat suam uxorem propter fornicationem (I Cor. VII). Fornicatio autem
triplex est. Lubrica opere, phantastica cogitatione. Unde: Qui viderit
mulierem ad concupiscendum eam, jam moechatus est in corde suo (Matth.
V). Apostatica discessione, quando a via sanctae conversationis reditur
ad saeculum et vomitum. Unde: Perdidisti omnes qui fornicantur abste
(Psal. LXXII). Hanc triplicem Osee breviter comprehendit: Fornicatio,
inquit, et vinum et ebrietas auferunt cor (Ose. IV). Fornicationem
apostaticam vinum, phantasticam ebrietatem, lubricam vocans
fornicationem. Huic triplici fornicationi triplex apponitur remedium.
Desponsatio, de qua in Osee Dominus: Sponsabo te mihi in misericordia;
sponsabo te mihi in justitia, sponsabo te mihi in fide (Ose. II). In
misericordia reconciliationis, in justitia confoederationis, in fide
tori nuptialis. Hanc ab se longe fornicantem Dominus ad se vocans, sola
misericordia sibi reconciliat, reconciliatam justificat, et justificatam
interno quodam gustu suae dulcedinis velut quadam pignoris arrha sibi
facit confoederatam et sui desiderii aestu flagrantem, tandem de exsilio
hujus peregrinationis eripiens, in thalamum ipsam absorbentis gloriae
introducit et amplexu suo glorificat. Triplex igitur est desponsatio: in
misericordia, in justitia, in fide; quae in fide conjungit sponsum et
sponsam; quae in misericordia, Christum et Ecclesiam; quae in justitia,
Deum et animam. Prima est legitima, secunda mystica, tertia spiritualis.
Legitima lubricae fornicationis, mystica phantasticae, spiritualis
apostaticae remedium est. Nam unicuique suam propter fornicationen
habere permittitur, et Ecclesia a Christo suo electa de fornicatione
eximitur. Christiana vero amica post diuturnam incontinentiam ad priorem
virum suum revertens et illi castro amore inhaerens, cum eo unus
spiritus efficitur. In figura triplicis desponsationis apud Judaeos in
nuptiis parabatur triclinium, id est trium lectorum thalamus
discubitorius ex tris et [k][l][iac][n][ee] cline, quod est lectus,
dicitur quibus magister convivii vocatus architriclinus praesidebat.
Thalamus autem est locus complectentium se amore conjugali. In primo
lecto sunt sponsus et sponsa; in secundo, Christus et Ecclesia; in
tertio, Deus et anima. Primus legitimus, secundus mysticus, tertius
spiritualis, imo primus est ille lectus materialis, secundus uterus
virginalis, de quo Propheta inquit: tanquam sponsus procedens de thalamo
suo (Psal. XVIII). Tertius mens sincera devota et fidelis. Unde
Apostolus: Timeo ne sicut serpens seduxit Evam astutia sua, ita
corrumpantur sensus vestri, et excedant a simplicitate, quae est in
Christo Jesu (II Cor. XI).
|
|
