|
Beati qui persecutionem patiuntur propter justitiam (Matth. V). Alii
propter injustitiam, alii propter falsam et simulatam justitiam, alii
propter veram justitiam persecutionem patiuntur. Primi sunt iniqui,
secundi hypocritae, tertii electi. Fit autem persecutio quadruplici
gladio: poenae, linguae, humanae perturbationis et diabolicae
suggestionis. De prima dicitur: Tribulatio an gladius? (Rom. VIII.) De
secunda: Lingua eorum gladius acutus (Psal. LVI). De tertia: Tuam ipsius
animam pertransibit gladius (Luc. II). De quarta: A gladio maligno eripe
me (Psal. CXLIII). His quatuor gladiis opponuntur duo gladii
ecclesiasticae defensionis. Unde Petrus: Ecce duo gladii hic (Luc.
XXII). Et Dominus: Satis est (ibid.).
|
|
