|
Tres sunt qui testimonium dant in coelo (I Joan. V). Tres sunt coeli,
tres terrae, tria testimonia. Primum coelum Deus. In hoc plenae et
summae perfectionis testimonium dat potentia, sapientia, benignitas,
Pater, filius et Spiritus sanctus, et hi tres proprie et principaliter
unum sunt (ibid.), ex quo omnia, in quo omnia, per quem omnia. Secundum
coelum Angeli. Unde Rorate coeli desuper (Isa. XLV), in quo testimonium
dant felicitatis, virtus, veritas, charitas, et hi tres unum, quoniam ex
uno unum sunt, de potentia Dei virtus, de sapientia veritas, de
benignitate charitas. Coelum tertium spirituales viri qui enarrant
gloriam Dei; in quibus dant testimonium justificationis, fides, spes,
charitas. Et hi tres ideo unum, quia ex uno. Fides de sapientia
illuminat ad veritatem; ignis de Spiritu sancto inflammat ad charitatem:
et per haec duo spem habemus perveniendi ad Patrem.
Prima terra est populus poenitens, terra sancta, in hac testimonium
remissionis dant spiritus, aqua, et sanguis, id est compunctio,
confessio, remissio. Spiritus sanctus scrutans corda et renes, dum de
peccato, justitia et judicio peccatorum arguit, nimirum poenitentia
pungit. Ideo spiritus illam significat quam dat. Aqua significat
confessionem, quia in confessione peccata lavantur; quam saepe
manifestant rivi oculorum. Bona est confessio oris, melior oculorum,
optima operum. Spiritum ergo compunctionis, aquam intellige
confessionis. Sequitur sanguis remissionis, sine sanguine enim non fit
remissio. Et hi tres unum, quia ab uno a quo omne datum optimum (Jac.
I). Terra autem media in opere Adae maledicta: quae scinditur vomere
comminationis, perfunditur rore promissionis, spinas et tribulos
germinans: tres habet testes perditionis: concupiscentiam carnis,
concupiscentiam oculorum, superbiam vitae. Terra ultima damnationis
aeternae habet testes ignem inexstinguibilem, vermem immortalem, vel
damnatorum carnem incorruptibilem; et ex his desperationem. Quia si
substantialis ignis vel vermis esset terminabilis, posset quoque poena
esse temporalis.
|
|
