|
Nolite conformari huic saeculo; sed reformamini in novitate sensus
vestri, ut probetis quae sit voluntas Dei bona, et beneplacita et
perfecta (Rom. XII). Mundus triformis est: Prima forma nobis
congratulatur flore prosperitatis per delectationem; secunda qua nos
deosculatur honore dignitatis per praelationem; tertia qua nos
amplexatur amore potestatis per dominationem. Per primam nos fatigat,
per secundam vincit, per tertiam victos ligat. Sunt autem oscula mundi
similia osculis Judae. Judas Christum osculo tradidit in manus
Judaeorum; mundus, sequaces sui in potestate daemoniorum. Judas dixit
Judaeis: Quemcunque osculatus fuero, ipse est; tenete eum (Matth. XXVI).
Mundus dicit diabolo et angelis ejus: Quemcunque osculatus fuero, ipse
est, damnate eum. Salubri ergo consilio monet nos Apostolus: Nolite
conformari huic saeculo (Rom. XII), sed cur? quia triformis est, et
tribus modis illi conformamur: per delectationem prosperitatis in
luxuriam, per ambitionem dignitatis in superbiam, per abusionem
potestatis in violentiam. Prosperitas emollit, dignitas extollit,
potentia in ruinam compellit. Haec sunt vitia quae prius evellit,
dicens: Nolite conformari huic saeculo. Quasi dicat: Declinate a malo.
Secundo virtutes inserit, subjungens: Sed reformamini in novitate
(ibid.). Quasi dicat: Et facite bonum: Cum dicit in novitate, vetustatem
notat praecessisse, quae triplex est: Prima est in corde, carnis
desideria per cogitationem: secunda est in ore, arrogantia per
locutionem; tertia in opere, flagitia per exhibitionem. Si non esset
vetustas in corde, non dixisset: Renovamini in spiritu mentis vestrae
(Ephes. IV). Si non esset arrogantia in ore, non diceret: Ut omne os
obstruatur et subditus fiat omnis mundus Deo (Rom. III). Si non esset in
opere, non diceret: Exhibuistis membra vestra servire immunditiae et
iniquitati ad iniquitatem, etc. (Rom. VI). Ecce triformis vetustas in
imagine veteris hominis, quam sicut portavimus, portemus imaginem
coelestis (I Cor. II), quae triformis est: amor aequitatis in corde,
contra carnis desideria, confessio humilitatis in ore contra
arrogantiam, innocentia simplicitatis in opere contra flagitia.
|
|
