|
Dixit Dominus Petro: Petre, amas me? (Joan. XXI.) Tres sunt proprietates
lapidis: Sunt enim solidi, asperi, aedificio apti. Solidi eos designant
qui non cedunt vitiis; asperi, eos qui aspere vivunt; aedificio apti,
eos qui virtutibus proficiunt. Ille ergo Petrus est qui vitiis non
cedit, aspere vivit, virtutibus proficit. Tria quoque considerantur in
amore, ut proximum non negligat, seipsum diligat, Deum in partem (quia
bonus est) eligat; proximum diligat, plusquam proximum se, Deum plusquam
se. Cui hae proprietates lapidis et amoris sunt, se esse Petrum vere
fatetur. Tertio dicit Dominus: Pasce oves meas (ibid.). Forma pasce,
doctrina pasce, oratione sancta pasce. Petrus factus pastor boni
pastoris prosequitur formam tribus modis; pascit servos correctione in
virga poenitentiae, pascit mercenarios consolans mercede justitiae,
pascit filios erudiens gratia obedientiae. Pastores autem malis aliis
designantur proprietatibus. Sunt enim lapides duri, sicci, gelidi. Duri
crudelitate, carentes spiritu mansuetudinis; sicci ariditate, non
habentes humorem gratiae; gelidi, igne Spiritus sancti non calentes. Hi,
dicente ter Domino: Amas me, non vere respondere possunt; Amo te aut me.
Proximum enim talis odit ex malitia, seipsum ob pigritiam negligit, ex
avaritia Deum non colit: In proximum nocens ex despectu; in se pestilens
ex defectu; in Deum praesumens ex contemptu. Hi audientes: Pasce oves
meas, pascunt eas perverse tribus modis: Operis forma, docentes male
vivere per transgressionem facti; verbi doctrina, docentes caute fallere
per abusionem facti; orationis opere, docentes causas agere per
contemplationem nummi. Praelati ergo mali sic pascunt oves Christi pro
se, imo sic depascunt, vellus abstrahunt, lac bibunt, carnes corrodunt.
Considerans autem quod pastor a pascendo dicitur, ne sit pastor vel
nomine tantum, ex toto negligit gregem, et omni studio pascit ventrem,
idque modis tribus. Suavi ciborum sapore condito, ut bene sapiat gustui;
delectabili odore aromatico, ut bene redoleat odoratui; desiderabili
nitore mirifico, ut placeat aspectui. Ecce Nabuzardam coquus Pharaonis,
qui muros dejecit Jerusalem. Gulositas enim corpus animam et mentem,
quasi civitatem quamdam destruit.
|
|
